in suis iuribus ac libertatibus infrascriptis conseruare, ac ab iniurijs quibuslibet defendere et tueri graciose: vt ex congregacione dictorum magistrorum, doctorum | et scolarium, pro conuersione infidelium paganorum et scismaticorum, dieto regno confinancium, maior deuocio predicacionis et instruccio fidei katholice ad laudem et gloriam omnipotentis dei et genitricis | eius gloriose Virginis Marie crescat et augeatur. Omnes enim causa dicti studij ad ipsam ciuitatem Cracouiensem accedentes, uel ab ipso studio recedentes, cum omnibus rebus ipsorum, in omnibus et singulis passibus, | pontibus et custodijs nullum theloneum, pedagium uel passagium soluere debeant per totum suum regnum. Sed et prouisiones magistrorum, doctorum, scolarium et aliorum prediciorum, quas uel ipsi in partibus | Circumiacentibus comparare voluerint. Uel eis amicorum, parentum vel fautorum liberalitate fuerint elargite in esculentis et poculentis, siue lignis et alijs rebus quibuscunque, que ad victum eorum fuerint opportuna, | in predictam ciuitatem Cracouiam per aquam uel terram ab omni theloneo libera et exempta transire permisit, nec per quempiam ea wlt quomodolibet impedirj. Item quod magistri, scolares et alij supradicti, qui gracia studij in | ipsa ciuitate Cracouiensi morabuntur, rectorem habeant, qui in ciuilibus iurisdictionem habeat ordinariam in eosdem, et in criminalibus leuibus causis, veluti si forte scolaris uel quilibet predictorum pro verbali iniuria, aut | pro capillacione modica, seu pro percussione de manu uel pugno, eciam ad leuem sanguinis efusionem, fuerit inculpatus, coram rectore suo, et alibi nullatenus, debeat conveniri, inhibens sub certis penis, | quod nullus aliquem predictorum in premissis ciuilibus uel criminalibus leuibus, ut prefertur, ad alium iudicem trahere presumat. Verum et in criminalibus ac capitalibus, puta furto, latrocinio, homicidio, stupro uel adulterio | et similibus notorie commissis, si predictorum quispiam fuerit deprehensus, si clericus fuerit, statim ad episcopale iudicium remittatur; si autem laycus, regali iudicio subiacebit; ibi tamen non iudicabitur, nisi in | rectoris presencia, nec per consuetudines uel statuta municipalia ciuitatis Cracouiensis uel regnj Polonie, sed per instituciones iuris canonici et ciuilis nec condempnarj possit aliquibus probacionibus, sed pocius ad expurgacionem | condignam proborum virorum licite admittatur. Insuper si aliquis de predictis de graui et capitali crimine fuerit inculpatus, cuius cognicio, vt prefertur, non pertinet ad rectorem, idem non poterit nec debebit deprehendi, | nisi cum rectoris familia et ipso primitus requisito nec iudicari debebit aliter, nisi prout superius de clerico et layco clare
